Þetta er afar ferskt og gott kartöflusalat og tilvalið að nota nýjar kartöflur í það. Því minni sem kartöflurnar eru, því betra, og þú þarft ekki að hugsa um að flysja þær. Ef þú notar stórar kartöflur þá þarftu að skera þær í tvennt eða fernt, í munnbitastærð.

Kartöflusalat

• 640gr kartöflur
• 4 tsk balsam edik
• 1 egg
• 1 rauðlaukur, fínsaxaður
• 60gr grænar baunir, frosnar
• 2 stórar súrar gúrkur
• 4 tsk saxaður graslaukur
• 2 msk majones eða sýrður rjómi
• salt og pipar

Undirbúningur: 10 mínútur

Eldunartími: 2o mínútur

Settu kartöflurnar í kalt vatn með 2 tsk af salti út í. Láttu suðuna koma upp og láttu sjóða í 15 mínútur eða þar til kartöflurnar eru soðnar en ekki of mjúkar.

Helltu vatninu af kartöflunum og veltu þeim upp úr balsam edikinu á meðan þær eru heitar svo þær drekki í sig bragðið.

Sjóddu eggið, láttu suðuna koma upp á þeim, slökktu svo undir og láttu sitja í heitu vatninu í 8 mínútur. Settu svo í ískalt vatn og láttu liggja í 10 mínútur.

Settu frosnu baunirnar í pott með smá vatni og láttu suðuna koma upp. Sjóddu í 2 mínútur eða þar til þær eru farnar að meyrna örlítið.

Blandaðu nú öllu hráefninu saman í skál, kryddaðu til með salti og pipar eftir smekk.