Fljótlegt pasta puttanesca

Birtist í Aðalréttir, Uppskriftir

Það er ofboðslega fljótlegt að útbúa pasta puttanesca (ít.: gleðikonu pasta) og svo er hægt að búa til skemmtilegar pasta bökur úr afgangnum.

Þú getur notað hvaða pasta sem þér finnst best með, ég nota alltaf spaghetti því mér finnst það passa sósunni best.

Puttanesca sósa

fyrir 3-4

  • 1 msk ólífuolía
  • 1 laukur, fínsaxaður
  • 3 hvítlauksrif, marin
  • 1 msk capers, grófsaxað
  • 1 rautt chili, fræhreinsað og fínsneitt
  • handfylli ólífur, grófskornar
  • 1 dós hakkaðir tómatar
  • 2 dl vatn (Hálf tómatadósin)
  • 1-2 paprikur, sneiddar
  • smá parmesan
  • salt og pipar
  • kryddjurtir eftir smekk
  • -
  • pasta eftir smekk og fjölda svangra
Undirbúningstími: 5 mínútur

Eldunartími: 10 mínútur

Byrjaðu á að setja vatn og salt í pott fyrir pastað. Settu pastað út í þegar suðan er komin upp og sjóddu skv leiðbeiningum á pakkanum.

Á meðan að pastað sýður þá hitar þú olíu í potti á meðal hita, skellir lauk og hvítlauk út í og steikir þar til laukurinn er glær eða í um 2-3 mínútur.

Þá seturðu capers og ólífurnar út í ásamt chiliinu og steikir í 30 sekúndur.

Settu nú tómatana úr dósinni út í pottinn ásamt hálfri dós af vatni og hrærðu vel. Saltaðu og pipraðu og láttu malla  í 5 mínútur við góðan hita.

Skelltu paprikunum út í síðustu 2-3 mínúturnar og rífðu niður ferskar kryddjurtir eða settu 1/2 - 1 tsk þurrkaðar kryddjurtir út í.

Hellt yfir pastað í skál og rifinn parmesan yfir með smá nýmöluðum svörtum pipar.

Ef verður afgangur af pastanu og sósunni þá er sniðugt að setja hann í nokkur lítil eldföst mót eða eitt stórt.
Það má setja smá saxað grænmeti, skinku eða beikon með; taka bara til í ísskápnum.
Rífa svo parmesan eða einhvern annan ost yfir og baka í 180°C heitum ofni í 10-15 mínútur.
Geggjað með fersku salati og hvítlauksbrauði.