Print Friendly, PDF & Email

Það er ekkert eins og rif sem renna af beinunum, dísæt og mjúk. Þessi uppskrift er afar einföld og þú getur valið hvort þú klárar að elda rifin á grillinu eða í ofni. Sósuna geturðu líka notað sem grillsósu á annað kjöt.

Grísarif fyrir 6

  • 1.5-2 kg grísarif
  • 1 laukur, fínsaxaður
  • 1 msk ólífuolía
  • 1 hvítlauksrif, marið
  • 2 msk paprikuduft, reykt
  • 1 tsk chiliflögur
  • 1 dós niðursoðnir tómatar
  • 3 msk tómatpúrra
  • 1.5 dl hvítvínsedik
  • 125 gr púðursykur

Undirbúningur: 20 mínútur

Eldunartími: 2.5-3 klst

Hitaðu ofninn í 140°C. Settu grísarifinn í ofnpott og settu vatn í pottinn þannig að rétt fljóti yfir rifin. Lokaðu ofnpottinum með loki eða álpappír og settu í ofninn. Láttu malla í ofninum í 90 mínútur.

Taktu rifin upp úr vatninu eftir suðutímann og láttu renna af þeim vatnið, leggðu álpappír yfir  og kældu ef þú ætlar ekki að steikja eða grilla þau strax.

Á meðan rifin sjóða í ofninum gerirðu sósuna.

Steiktu laukinn í olíu í 5-6 mínútur og bættu þar næst við hvítlauk, reykta paprikuduftinu og chiliflögunum. Hrærðu vel saman þar til allt fer að ilma í 1-2 mínútur. Bættu þá tómötunum og tómatpúrrunni út í pottinn ásamt ediki og sykri og láttu sjóða við lágan hita í 10-15 mínútur. Settu sósuna í krukku þar til þú ætlar að steikja eða grilla rifin.

Ef þú ætlar að steikja rifin í ofni þá hitarðu ofninn í 200C.

Penslaðu sósunni yfir rifin og settu þau á bökunarpappír á plötu og inn í ofninn. Penslaðu eftir aðrar 20 mínútur og snúðu rifjunum við. Steiktu í 20 mínútur í viðbót eða í 40 mínútur alls.

Ef þú ætlar að grilla rifin þá grillarðu þau á mjög heitu grilli og penslar jafnóðum. Snúðu reglulega og penslaðu. Kjötið er laust í sér þannig að þú gætir þurft að nota grillspaða eða tvær tangir.

Þegar rifin eru til þá skerðu þau í sundur og setur í dýrindis hrúgu á stórt fat. Það er gott á setja afganginn af sósunni með í skál ef einhver er til að hægt sé að dýfa kjötinu í sósuna.

Borið fram með brakandi salati, ísköldum drykk og helst í góðum félagsskap.