Kryddkaffi
Hér kemur uppskrift af kaffidrykk sem er tilvalinn í eftirrétt. Drykkinn má bera fram heitan eða ískaldan á mulinn klaka, með rjóma eða án, allt eftir smekk hvers og eins.
Kryddkaffi fyrir 2
- 500ml vatn
- 2 kanilstangir
- 4 negulnaglar, heilir
- 2 stjörnuanís
- 25gr hrásykur
- 20gr púðursykur
- 5msk malað kaffi
Settu vatnið, kanilstangirnar, negulinn, stjörnuanísinn, hrá- og púðursykur í pott og láttu suðuna koma upp hægt og rólega.
Þegar þetta byrjar að sjóða þá lækkarðu hitann undir pottinum svo að rétt mallar og lætur malla í 20 mínútur. Taktu þá pottinn af hitanum og hrærðu kaffinu saman við og láttu trekkja í um 5 mínútur með lokið á pottinum.
Þar næst er þetta síað í ílát.
Þetta má drekka heitt eða ískalt. Mér finnst þetta rosalega gott út á mulinn klaka með smávegis rjóma út í.
Ef þú vilt bæta smá “kaffi í kaffið” þá er mjög gott að setja út í þetta smá romm, dökkt eða ljóst. Eins má setja í þetta viskí eða koníak, þetta kaffi er mjög skemmtilegt sem uppistaða í öðruvísi Irish Coffee.